វ៉ាក់សាំងដូសជំរុញ

មាតិកាអាប់ដេតចុងក្រោយនៅថ្ងៃទី 9 ខែធ្នូ ឆ្នាំ 2022

ការទទួលបានព័ត៌មានថ្មីៗអំពីដូសជំរុញ នៅពេលដែលអ្នកមានលក្ខខណ្ឌគ្រប់គ្រាន់ភ្លាមៗ គឺជាការការពារដ៏ល្អបំផុតកុំឱ្យមានជំងឺធ្ងន់ធ្ងរ និងស្លាប់ដោយសារជំងឺ COVID-19។

Centers for Disease Control and Prevention (CDC) បានកែប្រែការណែនាំអំពីដូសជំរុញដូចខាងក្រោម៖

ឥឡូវនេះ កុមារអាយុ 6 ខែដល់ 5 ឆ្នាំដែលបានចាក់វ៉ាក់សាំងជំងឺ COVID-19 ស៊េរី Moderna ដើមដែលមានមួយវ៉ាឡង់ មានសិទ្ធិចាក់ដូសជំរុញពីរវ៉ាឡង់ថ្មី បន្ទាប់ពីចាក់ស៊េរីចម្បងគ្រប់ចំនួនបាន 2 ខែ។
ឥឡូវនេះ វ៉ាក់សាំងជំងឺ COVID-19 ស៊េរី Pfizer សម្រាប់កុមារអាយុ 6 ខែដល់ 4 ឆ្នាំនឹងមានវ៉ាក់សាំង Pfizer មួយវ៉ាឡង់ចំនួន 2 ដូស និងវ៉ាក់សាំង Pfizer ពីរវ៉ាឡង់ចំនួន 1 ដូស។
- ឥឡូវនេះ កុមារអាយុ 6 ខែដល់ 4 ឆ្នាំដែលមិនទាន់ចាប់ផ្ដើមចាក់វ៉ាក់សាំង Pfizer ស៊េរីចម្បងដែលមាន 3 ដូស ឬមិនបានចាក់ដូសទី 3 នៃវ៉ាក់សាំងស៊េរីចម្បងរបស់ខ្លួននឹងត្រូវចាក់វ៉ាក់សាំង Pfizer ស៊េរីថ្មី។
- កុមារអាយុ 6 ខែដល់ 4 ឆ្នាំដែលបានចាក់វ៉ាក់សាំង Pfizer ស៊េរីចម្បងគ្រប់ចំនួន 3 ដូសរួចរាល់ហើយនឹងមិនមានសិទ្ធិចាក់ដូសបន្ថែម ឬដូសជំរុញនៅពេលនេះទេ។
ដូសជំរុញជំងឺ COVID-19 ស៊េរី Novavax មានផ្ដល់ជូនសម្រាប់មនុស្សពេញវ័យ ប្រសិនបើពួកគេបានចាក់វ៉ាក់សាំងស៊េរីចម្បងរួចរាល់ ប៉ុន្តែមិនធ្លាប់ចាក់ដូសជំរុញជំងឺ COVID-19—ហើយបើពួកគេមិនអាច ឬនឹងមិនចាក់ដូសជំរុញស៊េរី mRNA ថ្មីទេ។

ប្រសិនបើអ្នកបានចាក់…	អ្នកដែលគួរតែចាក់ដូសជំរុញ	ប្រភេទដូសជំរុញដែលត្រូវចាក់	ពេលវេលាដែលត្រូវចាក់ដូសជំរុញ
Pfizer-BioNTech	បុគ្គលអាយុ 5ឆ្នាំឡើង	កុមារអាយុ 5 ឆ្នាំដែលបានចាក់វ៉ាក់សាំង Pfizer អាចចាក់បានតែដូសជំរុញពីរវ៉ាឡង់ថ្មីស៊េរី Pfizer ប៉ុណ្ណោះ។ មនុស្សអាយុ 6 ឆ្នាំឡើងគួរតែចាក់ដូសជំរុញស៊េរី Moderna ឬ Pfizer ពីរវ៉ាឡង់ថ្មីទោះពួកគេបានចាក់វ៉ាក់សាំងស៊េរីចម្បងស៊េរីអ្វីក៏ដោយ។	បន្ទាប់ពីចាក់ស៊េរីចម្បង ឬដូសជំរុញលើកមុនយ៉ាងហោចណាស់ 2 ខែ
Pfizer-BioNTech	បុគ្គលអាយុ 5ឆ្នាំឡើង	មនុស្សអាយុ 18 ឆ្នាំឡើងទៅក៏អាចជ្រើសរើសចាក់ដូសជំរុញស៊េរី Novavax បានផងដែរ ប្រសិនបើពួកគេមិនអាច ឬនឹងមិនចាក់ដូសជំរុញស៊េរី mRNA ថ្មីទេ។	Novavax: យ៉ាងហោចណាស់ 6 ខែ បន្ទាប់ពីចាក់ស៊េរីដំបូងរួចរាល់
Moderna	6 ខែឡើងទៅ	កុមារអាយុ 6 ខែដល់ 4 ឆ្នាំគួរតែចាក់ដូសពីរវ៉ាឡង់ថ្មីដែលមានម៉ាកយីហោដូចគ្នាទៅនឹងវ៉ាក់សាំងស៊េរីចម្បងរបស់ពួកគេ។ មនុស្សអាយុ 5 ឆ្នាំឡើងទៅគួរតែចាក់ដូសជំរុញពីរវ៉ាឡង់ថ្មីនៃយីហោ Pfizer ឬ Moderna។	បន្ទាប់ពីចាក់ស៊េរីចម្បង ឬដូសជំរុញលើកមុនយ៉ាងហោចណាស់ 2 ខែ
Moderna	6 ខែឡើងទៅ	មនុស្សអាយុ 18 ឆ្នាំឡើងទៅក៏អាចជ្រើសរើសចាក់ដូសជំរុញស៊េរី Novavax បានផងដែរ ប្រសិនបើពួកគេមិនអាច ឬនឹងមិនចាក់ដូសជំរុញស៊េរី mRNA ថ្មីទេ។	Novavax: យ៉ាងហោចណាស់ 6 ខែ បន្ទាប់ពីចាក់ស៊េរីដំបូងរួចរាល់
Novavax	បុគ្គលអាយុ 12 ឆ្នាំឡើង	មនុស្សអាយុ 12 ឆ្នាំឡើងទៅគួរតែចាក់ដូសជំរុញពីរវ៉ាឡង់ថ្មីនៃយីហោ Pfizer ឬ Moderna។	បន្ទាប់ពីចាក់ស៊េរីចម្បង ឬដូសជំរុញលើកមុនយ៉ាងហោចណាស់ 2 ខែ
Novavax	បុគ្គលអាយុ 12 ឆ្នាំឡើង	មនុស្សអាយុ 18 ឆ្នាំឡើងទៅក៏អាចជ្រើសរើសចាក់ដូសជំរុញស៊េរី Novavax បានផងដែរ ប្រសិនបើពួកគេមិនអាច ឬនឹងមិនចាក់ដូសជំរុញស៊េរី mRNA ថ្មីទេ។	Novavax: យ៉ាងហោចណាស់ 6 ខែ បន្ទាប់ពីចាក់ស៊េរីដំបូងរួចរាល់
Johnson & Johnson*	បុគ្គលអាយុ 18 ឆ្នាំឡើង	មនុស្សអាយុ 18 ឆ្នាំឡើងទៅគួរតែចាក់ដូសជំរុញពីរវ៉ាឡង់ថ្មីនៃយីហោ Pfizer ឬ Moderna។	បន្ទាប់ពីចាក់ស៊េរីចម្បង ឬដូសជំរុញលើកមុនយ៉ាងហោចណាស់ 2 ខែ
Johnson & Johnson*	បុគ្គលអាយុ 18 ឆ្នាំឡើង	មនុស្សអាយុ 18 ឆ្នាំឡើងទៅក៏អាចជ្រើសរើសចាក់ដូសជំរុញស៊េរី Novavax បានផងដែរ ប្រសិនបើពួកគេមិនអាច ឬនឹងមិនចាក់ដូសជំរុញស៊េរី mRNA ថ្មីទេ។	Novavax: យ៉ាងហោចណាស់ 6 ខែ បន្ទាប់ពីចាក់ស៊េរីដំបូងរួចរាល់

*វ៉ាក់សាំងស៊េរី mRNA គឺជាអាទិភាព ប៉ុន្តែវ៉ាក់សាំងជំងឺ COVID-19 ប្រភេទ Johnson & Johnson នៅតែអាចប្រើបាន ប្រសិនបើអ្នកមិនអាច ឬមិនចង់ចាក់វ៉ាក់សាំងផ្សេងទៀត។

ដូសសម្រាប់បុគ្គលមានប្រព័ន្ធភាពស៊ាំចុះខ្សោយ

ប្រសិនបើអ្នកមានប្រព័ន្ធភាពស៊ាំចុះខ្សោយកម្រិតមធ្យមឬធ្ងន់ធ្ងរ នោះការណែនាំនឹងមានភាពខុសគ្នា។

បើអ្នកបានចាក់…	តើខ្ញុំគួរតែចាក់ដូសបន្ថែមដែរទេ?	តើខ្ញុំអាចចាក់ដូសជំរុញបានទេ?
Pfizer៖ ចាក់ 2 ដូសមុនក្រោយគ្នា 21 ថ្ងៃសម្រាប់អាយុ 5 ឆ្នាំឡើងទៅ	បាទ/ចាស បុគ្គលអាយុ 5 ឆ្នាំឡើងទៅដែលមានប្រព័ន្ធភាពស៊ាំចុះខ្សោយកម្រិតមធ្យមឬធ្ងន់ធ្ងរគួរតែចាក់ដូសបន្ថែមបន្ទាប់ពីចាក់វ៉ាក់សាំងលើកទី 2 បាន 28 ថ្ងៃ។	បាទ/ចាស ដូសជំរុញស៊េរី mRNA ថ្មីដែលមានពីរវ៉ាឡង់ត្រូវបានណែនាំឱ្យចាក់បន្ទាប់ពីចាក់ដូសចុងក្រោយឱ្យទាន់សភាពការណ៍បាន 2 ខែសម្រាប់បុគ្គលអាយុ 5 ឆ្នាំឡើងទៅ។ កុមារអាយុ 5 ឆ្នាំដែលបានចាក់វ៉ាក់សាំង Pfizer អាចចាក់បានតែដូសជំរុញពីរវ៉ាឡង់ថ្មីស៊េរី Pfizer ប៉ុណ្ណោះ។ មនុស្សអាយុ 18 ឆ្នាំឡើងទៅក៏អាចជ្រើសរើសចាក់ដូសជំរុញស៊េរី Novavax បានផងដែរ បន្ទាប់ពីចាក់ស៊េរីចម្បងបាន 6 ខែ ប្រសិនបើពួកគេមិនអាច ឬនឹងមិនចាក់ដូសជំរុញស៊េរី mRNA ថ្មីទេ។
Pfizer៖ ចាក់ 3 ដូសសម្រាប់កុមារអាយុ 6 ខែដល់ 4 ឆ្នាំ។ ចាក់ 2 ដូសដំបូងនៅមុនក្រោយគ្នាចំនួន 21 ថ្ងៃ ហើយចាក់ដូសទី 3 បន្ទាប់ពីដូសទី 2 បាន 8 សប្ដាហ៍។	ទេ កុមារអាយុ 6 ខែដល់ 4 ឆ្នាំដែលមានប្រព័ន្ធភាពស៊ាំចុះខ្សោយកម្រិតមធ្យមឬធ្ងន់ធ្ងរ មិនគួរចាក់ដូសបន្ថែមនៃស៊េរីចម្បងទេនៅពេលនេះ។	ទេ ដូសពីរវ៉ាឡង់ថ្មីមិនត្រូវបានអនុញ្ញាតឱ្យប្រើសម្រាប់មនុស្សអាយុ 6 ខែដល់ 4 ឆ្នាំដែលបានចាក់វ៉ាក់សាំង Pfizer ស៊េរីចម្បងគ្រប់ចំនួនរួចរាល់នៅពេលនេះទេ។
Moderna៖ ចាក់ 2 ដូសមុនក្រោយគ្នា 28 ថ្ងៃសម្រាប់អាយុ 6 ខែដល់ ឡើងទៅ	បាទ/ចាស បុគ្គលអាយុ 6 ខែដល់ ឡើងទៅដែលមានប្រព័ន្ធភាពស៊ាំចុះខ្សោយកម្រិតមធ្យមឬធ្ងន់ធ្ងរគួរតែចាក់ដូសបន្ថែមបន្ទាប់ពីចាក់វ៉ាក់សាំងលើកទី 2 បាន 28 ថ្ងៃ។	បាទ/ចាស ដូសជំរុញស៊េរី mRNAថ្មីដែលមានពីរវ៉ាឡង់ត្រូវបានណែនាំឱ្យចាក់បន្ទាប់ពីចាក់ដូសចុងក្រោយឱ្យទាន់សភាពការណ៍បាន 2 ខែសម្រាប់មនុស្សអាយុ 6 ខែឡើងទៅ។ កុមារអាយុ 6 ខែដល់ 4 ឆ្នាំគួរតែចាក់ដូសពីរវ៉ាឡង់ថ្មីដែលមានម៉ាកយីហោដូចគ្នាទៅនឹងវ៉ាក់សាំងស៊េរីចម្បងរបស់ពួកគេ។ មនុស្សអាយុ 5 ឆ្នាំឡើងទៅគួរតែចាក់ដូសជំរុញពីរវ៉ាឡង់ថ្មីនៃយីហោ Pfizer ឬ Moderna។ មនុស្សអាយុ 18 ឆ្នាំឡើងទៅក៏អាចជ្រើសរើសចាក់ដូសជំរុញស៊េរី Novavax បានផងដែរ បន្ទាប់ពីចាក់ស៊េរីចម្បងបាន 6 ខែ ប្រសិនបើពួកគេមិនអាច ឬនឹងមិនចាក់ដូសជំរុញស៊េរី mRNA ថ្មីទេ។
Johnson & Johnson៖ អនុញ្ញាតឱ្យចាក់ 1 ដូសសម្រាប់អាយុ 18 ឆ្នាំឡើងទៅ*	បាទ/ចាស បុគ្គលអាយុ 18 ឆ្នាំឡើងទៅដែលមានប្រព័ន្ធភាពស៊ាំចុះខ្សោយកម្រិតមធ្យមឬធ្ងន់ធ្ងរគួរតែចាក់ដូសបន្ថែមជាមួយវ៉ាក់សាំងស៊េរី mRNA បន្ទាប់ពីចាក់ដូសទី 1 នៃវ៉ាក់សាំង J&J បាន 28 ថ្ងៃ។	បាទ/ចាស ដូសជំរុញស៊េរី mRNA ថ្មីដែលមានពីរវ៉ាឡង់ត្រូវបានណែនាំឱ្យចាក់បន្ទាប់ពីចាក់ដូសចុងក្រោយឱ្យទាន់សភាពការណ៍បាន 2 ខែសម្រាប់បុគ្គលអាយុ 18 ឆ្នាំឡើងទៅ។ មនុស្សអាយុ 18 ឆ្នាំឡើងទៅក៏អាចជ្រើសរើសចាក់ដូសជំរុញស៊េរី Novavax បានផងដែរ បន្ទាប់ពីចាក់ស៊េរីចម្បងបាន 6 ខែ ប្រសិនបើពួកគេមិនអាច ឬនឹងមិនចាក់ដូសជំរុញស៊េរី mRNA ថ្មីទេ។
Novavax: ចាក់ 2 ដូសមុនក្រោយគ្នា 21 ថ្ងៃសម្រាប់អាយុ 12 ឆ្នាំឡើងទៅ	ទេ មនុស្សដែលមានប្រព័ន្ធភាពស៊ាំចុះខ្សោយកម្រិតមធ្យមឬធ្ងន់ធ្ងរ មិនគួរចាក់ដូសបន្ថែមនៃស៊េរីចម្បងទេនៅពេលនេះ។	បាទ/ចាស ដូសជំរុញស៊េរី mRNA ថ្មីដែលមានពីរវ៉ាឡង់ត្រូវបានណែនាំឱ្យចាក់បន្ទាប់ពីចាក់ដូសចុងក្រោយឱ្យទាន់សភាពការណ៍បាន 2 ខែសម្រាប់បុគ្គលអាយុ 12 ឆ្នាំឡើងទៅ។ មនុស្សអាយុ 18 ឆ្នាំឡើងទៅក៏អាចជ្រើសរើសចាក់ដូសជំរុញស៊េរី Novavax បានផងដែរ បន្ទាប់ពីចាក់ស៊េរីចម្បងបាន 6 ខែ ប្រសិនបើពួកគេមិនអាច ឬនឹងមិនចាក់ដូសជំរុញស៊េរី mRNA ថ្មីទេ។

សំណួរចោទសួរជាញឹកញាប់

តើខ្ញុំត្រូវតែចាក់វ៉ាក់សាំងប្រភេទយីហោដូចគ្នាសម្រាប់ដូសជំរុញរបស់ខ្ញុំដែរទេ?

កុមារអាយុ 6 ខែដល់ 4 ឆ្នាំគួរតែចាក់ដូសពីរវ៉ាឡង់ថ្មីដែលមានម៉ាកយីហោដូចគ្នាទៅនឹងវ៉ាក់សាំងស៊េរីចម្បងរបស់ពួកគេ។

កុមារអាយុ 5 ឆ្នាំដែលបានចាក់វ៉ាក់សាំង Pfizer អាចចាក់បានតែដូសជំរុញពីរវ៉ាឡង់ថ្មីស៊េរី Pfizer ប៉ុណ្ណោះ។

កុមារអាយុ 5 ឆ្នាំដែលបានចាក់វ៉ាក់សាំង Moderna អាចចាក់ដូសជំរុញពីរវ៉ាឡង់ថ្មីស៊េរី Moderna ឬ Pfizer បាន។

មនុស្សអាយុ 6 ឆ្នាំឡើងគួរតែចាក់ដូសជំរុញស៊េរី Moderna ឬ Pfizer ពីរវ៉ាឡង់ថ្មីទោះពួកគេបានចាក់វ៉ាក់សាំងស៊េរីចម្បងស៊េរីអ្វីក៏ដោយ។

មនុស្សអាយុ 18 ឆ្នាំឡើងទៅក៏អាចជ្រើសរើសចាក់ដូសជំរុញស៊េរី Novavax បានផងដែរ ប្រសិនបើពួកគេមិនអាច ឬនឹងមិនចាក់ដូសជំរុញស៊េរី mRNA ថ្មីទេ។

ហេតុអ្វីបានជាដូសជំរុញមានសារៈសំខាន់?

ដូសជំរុញជួយផ្តល់ការការពារជាបន្តប្រឆាំងនឹងជំងឺធ្ងន់ធ្ងរចំពោះអ្នកដែលមានហានិភ័យខ្ពស់ក្នុងការកើតជំងឺ COVID-19

កាលពីមុន ដូសជំរុញត្រូវបានណែនាំសម្រាប់តែក្រុមមនុស្សមានហានិភ័យខ្ពស់ដែលអាចនឹងកើតជំងឺ COVID-19 ធ្ងន់ធ្ងរប៉ុណ្ណោះ ប៉ុន្តែគេបានបន្ថែមការណែនាំដោយមនុស្សដែលមានអាយុ 6 ខែឡើងទៅគួរតែចាក់ដូសជំរុញផងដែរ ដើម្បីជួយបង្កើនការការពារប្រឆាំងនឹងជំងឺ COVID-19។

ការចាក់ដូសជំរុញមានសារៈសំខាន់ខ្លាំងណាស់ ដោយសារមានវីរុសឆ្លងប្រភេទបំប្លែងខ្លួនថ្មីកាន់តែច្រើន និងករណីជំងឺ COVID-19 មានការកើនឡើងនៅទូទាំងសហរដ្ឋអាមេរិក។

វ៉ាក់សាំងជំងឺ COVID-19 ដែលត្រូវបានអនុញ្ញាត ឬអនុម័តនៅសហរដ្ឋអាមេរិកនៅតែមានប្រសិទ្ធភាពខ្ពស់ក្នុងការកាត់បន្ថយហានិភ័យនៃការកើតជំងឺធ្ងន់ធ្ងរ ការចូលសម្រាកព្យាបាលនៅមន្ទីរពេទ្យ និងការស្លាប់ដោយសារជំងឺ COVID-19 ថែមទាំងប្រឆាំងនឹងប្រភេទបំប្លែងខ្លួនថ្មីទៀតផង។ ទោះយ៉ាងណា វ៉ាក់សាំងបច្ចុប្បន្នអាចថមថយប្រសិទ្ធភាពក្នុងការការពារបន្តិចម្ដងៗ។ ដូសជំរុញនឹងបង្កើនការការពារដោយវ៉ាក់សាំងជំងឺ COVID-19 និងជួយឱ្យមានភាពស៊ាំកាន់តែយូរ។

តើអ្នកនៅតែជាមនុស្សដែលបានចាក់វ៉ាក់សាំងស៊េរីចម្បងដដែលមែនទេ?

បាទ/ចាស។ ការចាក់វ៉ាក់សាំងដល់អ្នកគ្រប់គ្នាដែលមានសិទ្ធិទទួលបានដោយចាក់ស៊េរីដំបូង (វ៉ាក់សាំង COVID របស់ក្រុមហ៊ុន Johnson & Johnson 1 ដូស ឬរបស់ក្រុមហ៊ុន Pfizer ឬ Moderna 2 ដូស) នៅតែជាអាទិភាពចម្បង។ មនុស្សពេញវ័យដែលមិនបានចាក់វ៉ាក់សាំងមានអត្រានៃការព្យាបាលនៅមន្ទីរពេទ្យខ្ពស់ជាងមនុស្សពេញវ័យដែលបានចាក់វ៉ាក់សាំងពី 10 ទៅ 22 ដង។ បុគ្គលដែលបានចាក់វ៉ាក់សាំងរួចគឺមិនងាយនឹងឈឺធ្ងន់ (ឬមិនឈឺទាល់តែសោះ) ដោយសារជំងឺ COVID-19 ទេ បើប្រៀបធៀបជាមួយបុគ្គលដែលមិនបានចាក់វ៉ាក់សាំង។ ការចាក់វ៉ាក់សាំងក៏អាចជួយបង្ការមិនឱ្យបុគ្គលនានាធ្លាក់ខ្លួនឈឺ និងមិនឱ្យមានរោគសញ្ញារយៈពេលយូរ ដែលត្រូវបានរាយការណ៍ដោយបុគ្គលដែលបានឈឺដោយសារ COVID-19 រហូតដល់ 50%។

ប្រសិនបើយើងត្រូវការការចាក់វ៉ាក់សាំងដូសជំរុញ តើនេះមានន័យថាវ៉ាក់សាំងមិនមានប្រសិទ្ធភាពទេឬ?

ទេ។ វ៉ាក់សាំងជំងឺ COVID-19 បច្ចុប្បន្នដែលយើងមាននៅសហរដ្ឋអាមេរិកកំពុងមានប្រសិទ្ធភាពល្អក្នុងការបង្ការជំងឺធ្ងន់ធ្ងរ ការចូលសម្រាកព្យាបាលនៅមន្ទីរពេទ្យ និងការស្លាប់ ថែមទាំងបង្ការវីរុសបំប្លែងខ្លួនថ្មីទៀតផង។ ទោះយ៉ាងណា អ្នកជំនាញផ្នែកសុខភាពសាធារណៈកំពុងមើលឃើញថា ការការពារប្រឆាំងនឹងជំងឺ COVID-19 កម្រិតស្រាលនិងមធ្យមមានការថយចុះ ជាពិសេសក្នុងចំណោមមនុស្សដែលមានហានិភ័យខ្ពស់។

ដូសជំរុញថ្មីត្រូវបានបង្កើតឡើងដើម្បីជួយបង្កើនភាពស៊ាំ និងផ្ដល់ការការពារកាន់តែប្រសើរទល់នឹងវីរុសបំប្លែងខ្លួនថ្មី omicron។ ប្រការសំខាន់គឺត្រូវចាក់ដូសដែលបានណែនាំទាំងអស់ ដើម្បីទទួលបានការការពារល្អបំផុត។

ប្រសិនបើខ្ញុំមិនចាក់ដូសជំរុញទេ តើខ្ញុំនៅតែត្រូវបានចាត់ទុកថាបានចាក់វ៉ាក់សាំងពេញលេញដែរឬទេ?

អ្នកបានចាក់វ៉ាក់សាំងជំងឺ COVID-19 ទាន់សភាពការណ៍ ប្រសិនបើអ្នកបានចាក់វ៉ាក់សាំងស៊េរីចម្បងសម្រាប់ជំងឺ COVID-19 រួចរាល់ និងបានចាក់ដូសជំរុញថ្មីៗបំផុតតាមការណែនាំរបស់ CDC សម្រាប់អ្នក។

តើខ្ញុំត្រូវបង្ហាញយ៉ាងដូចម្តេចថាខ្ញុំមានសិទ្ធិទទួលបានវ៉ាក់សាំងដូសជំរុញ?

អ្នកអាចរាយការណ៍ដោយខ្លួនឯងថាអ្នកមានសិទ្ធិទទួលបានវ៉ាក់សាំងដូសជំរុញ។ អ្នកមិនចាំបាច់បង្ហាញការណែនាំពីអ្នកផ្តល់សេវាថែទាំសុខភាពឡើយ។

សូមយកប័ណ្ណចាក់វ៉ាក់សាំងរបស់អ្នក ទៅកាន់ការណាត់ចាក់វ៉ាក់សាំងដូសជំរុញ ដើម្បីឲ្យអ្នកផ្តល់សេវាអាចបញ្ជាក់ថាអ្នកទទួលបានការចាក់ស៊េរីវ៉ាក់សាំង Pfizer ពីរដូសរួចមកហើយ។ ប្រសិនបើអ្នកមិនមានប័ណ្ណទេ អ្នកផ្តល់សេវាអាចរកមើលកំណត់ត្រារបស់អ្នកបាន។

តើដូសវ៉ាក់សាំងបន្ថែម និងដូសវ៉ាក់សាំងជំរុញមានភាពខុសគ្នាដូចម្តេចខ្លះ?

ដូសបន្ថែមគឺសម្រាប់អ្នកជំងឺមួយចំនួន (មើលតារាងខាងលើ) ដែលបានចាក់វ៉ាក់សាំងស៊េរីចម្បងគ្រប់ចំនួនហើយ ប៉ុន្តែភាពស៊ាំមិនមានការឆ្លើយតបខ្លាំងគ្រប់គ្រាន់។
ដូសជំរុញគឺសម្រាប់អ្នកជំងឺ នៅពេលដែលភាពស៊ាំរបស់ពួកគេទំនងជាចុះខ្សោយ បន្ទាប់ពីចាក់ស៊េរីវ៉ាក់សាំងដំបូង។

តើប្រព័ន្ធភាពស៊ាំចុះខ្សោយមានន័យដូចម្ដេច?

បុគ្គលដែលមានប្រព័ន្ធភាពស៊ាំចុះខ្សោយ និងបានចាក់វ៉ាក់សាំងជំងឺ COVID-19 ស៊េរី mRNA ដែលមាន 2 ដូស ឬវ៉ាក់សាំង J&J ដែលមាន 1 ដូស។

ប្រសិនបើអ្នកមានបញ្ហាសុខភាពខាងក្រោម អ្នកត្រូវបានចាត់ទុកថាមានប្រព័ន្ធភាពស៊ាំចុះខ្សោយពីកម្រិតមធ្យមទៅធ្ងន់ធ្ងរ ហើយអាចទទួលបានអត្ថប្រយោជន៍ពីដូសបន្ថែមនៃវ៉ាក់សាំង COVID-19។ នេះរាប់បញ្ចូលទាំងបុគ្គលដែល៖

កំពុងទទួលការព្យាបាលជំងឺមហារីកសកម្មទៅលើដុំសាច់ ឬមហារីកឈាម
បានទទួលការវះកាត់ប្តូរសរីរាង្គ និងកំពុងប្រើប្រាស់ថ្នាំដើម្បីទប់ប្រព័ន្ធភាពស៊ាំ
បានទទួលការវះកាត់ប្តូរកោសិកាដើមក្នុងរយៈពេល 2 ឆ្នាំចុងក្រោយ ឬកំពុងប្រើប្រាស់ថ្នាំដើម្បីទប់ប្រព័ន្ធភាពស៊ាំ
មានបញ្ហាកង្វះភាពស៊ាំចម្បងពីកម្រិតមធ្យមទៅធ្ងន់ធ្ងរ (ដូចជាជំងឺពីកំណើតដីស្សក (DiGeorge Syndrome) ជំងឺវីស្កុតអាល់ឌ្រីច (Wiskott-Aldrich Syndrome) ជាដើម)
បានឆ្លងវីរុសហ៊ីវធ្ងន់ធ្ងរ ឬមិនបានព្យាបាល
កំពុងទទួលការព្យាបាលសកម្មដោយប្រើឱសថប្រភេទស្តេរ៉ូអ៊ីតដែលមានកម្រិតដូសថ្នាំខ្ពស់ ឬឱសថផ្សេងទៀតដែលអាចទប់ការឆ្លើយតបនៃភាពស៊ាំ។

ទោះបីជាវ៉ាក់សាំងដែលយើងទទួលបានមានប្រសិទ្ធភាព 90% ប្រឆាំងនឹងប្រភេទវីរុសភាគច្រើនក៏ពិតមែន ប៉ុន្តែការសិក្សាស្រាវជ្រាវបង្ហាញថាបុគ្គលដែលមានប្រព័ន្ធភាពស៊ាំចុះខ្សោយពីកម្រិតមធ្យមទៅធ្ងន់ធ្ងរ មិនមែនសុទ្ធតែអាចបង្កើតភាពស៊ាំរឹងមាំទាំងអស់នោះទេ។ ដូសទីបីមិនត្រូវបានចាត់ទុកថាជាដូសជំរុញទេ ប៉ុន្តែវាគឺជាដូសបន្ថែមសម្រាប់បុគ្គលដែលមិនបានបង្កើតភាពស៊ាំគ្រប់គ្រាន់ក្រោយពីចាក់ស៊េរីវ៉ាក់សាំងដែលមានពីរដូស។

តើអ្វីជាបញ្ហាសុខភាពដែលមានស្រាប់?

មនុស្សគ្រប់វ័យដែលមានបញ្ហាដូចខាងក្រោម (មានជាភាសាអង់គ្លេសប៉ុណ្ណោះ) ងាយនឹងឈឺធ្ងន់ដោយសារជំងឺ COVID-19 ណាស់។ ឈឺធ្ងន់មានន័យថា បុគ្គលដែលមានផ្ទុកជំងឺ COVID-19 អាចនឹង៖

ព្យាបាលនៅមន្ទីរពេទ្យ
ត្រូវការសង្គ្រោះបន្ទាន់
ត្រូវការបំពង់អុកស៊ីសែនជាជំនួយសម្រាប់ដកដង្ហើម
ស្លាប់

វ៉ាក់សាំង COVID-19 (ដូសដំបូង និងដូសជំរុញ) និងវិធានការបង្ការផ្សេងទៀតសម្រាប់ COVID-19 មានសារៈសំខាន់ណាស់ ជាពិសេសប្រសិនបើអ្នកមានវ័យចំណាស់ ឬមានបញ្ហាសុខភាពច្រើនឬធ្ងន់ធ្ងរ រួមទាំងបញ្ហាសុខភាពក្នុងបញ្ជីនេះ។ បញ្ជីនេះមិនបានរួមបញ្ចូលគ្រប់បញ្ហាសុខភាពទាំងអស់ ដែលធ្វើឱ្យអ្នកមានហានិភ័យកាន់តែខ្ពស់ក្នុងការធ្លាក់ខ្លួនឈឺធ្ងន់ដោយសារជំងឺ COVID-19 ទេ។ ប្រសិនបើអ្នកមានបញ្ហាសុខភាពដែលមិនបានរួមបញ្ចូលនៅទីនេះ សូមពិគ្រោះជាមួយអ្នកផ្តល់សេវាថែទាំសុខភាពរបស់អ្នកអំពីវិធីប្រសើរបំផុតក្នុងការគ្រប់គ្រងបញ្ហាសុខភាពរបស់អ្នក និងការពារខ្លួនអ្នកពីជំងឺ COVID-19។

មហារីក
ជំងឺតម្រងនោមរ៉ាំរ៉ៃ
ជំងឺថ្លើមរ៉ាំរ៉ៃ
ជំងឺសួតរ៉ាំរ៉ៃ
ជំងឺភ្លេចភ្លាំង ឬបញ្ហាសរសៃប្រសាទផ្សេងទៀត
ជំងឺទឹកនោមផ្អែម (ប្រភេទទី 1 ឬទី 2)
ជំងឺមិនគ្រប់ទឹក
បញ្ហាបេះដូង
ឆ្លងវីរុសហ៊ីវ
ស្ថានភាពប្រព័ន្ធភាពស៊ាំចុះខ្សោយ (ប្រព័ន្ធភាពស៊ាំទ្រុឌទ្រោម)
បញ្ហាសុខភាពផ្លូវចិត្ត
លើសទម្ងន់ និងធាត់ពេក
មានផ្ទៃពោះ
ជំងឺគោលិការាងកណ្ដៀវ ឬថាល់ឡាសសេមៀ
ជក់បារី ពោលគឺកំពុងជក់ ឬបានផ្ដាច់
វះកាត់ប្តូរកោសិកាដើមរបស់ឈាម ឬសរីរាង្គរឹង
ជំងឺដាច់សរសៃឈាមខួរក្បាល ឬជំងឺសរសៃឈាមខួរក្បាលដែលប៉ះពាល់ដល់លំហូរឈាមទៅខួរក្បាល
បញ្ហាប្រើប្រាស់សារធាតុ
ជំងឺរបេង

តើអ្នកដែលមានប្រព័ន្ធភាពស៊ាំចុះខ្សោយកម្រិតមធ្យម ឬធ្ងន់ធ្ងរត្រូវការចំណារ/វេជ្ជបញ្ជា ឬឯកសារផ្សេងទៀតពីវេជ្ជបណ្ឌិត ដើម្បីចាក់ដូសទាំងនេះដែរឬទេ?

ទេ បុគ្គលម្នាក់ៗអាចបញ្ជាក់អត្តសញ្ញាណដោយខ្លួនឯង និងចាក់បានគ្រប់ដូសនៅគ្រប់ទីកន្លែងដែលមានផ្តល់វ៉ាក់សាំង។ វានឹងជួយធានាថាមិនមានឧបសគ្គបន្ថែមក្នុងការចូលប្រើប្រាស់សម្រាប់ប្រជាជននេះទេ។ ប្រសិនបើបុគ្គលដែលមានប្រព័ន្ធភាពស៊ាំចុះខ្សោយមានសំណួរអំពីស្ថានភាពសុខភាពជាក់លាក់របស់ពួកគេ ពួកគេអាចពិភាក្សាថាតើការចាក់វ៉ាក់សាំងបន្ថែមសមស្របសម្រាប់ពួកគេដែរឬទេ ជាមួយអ្នកផ្តល់សេវាថែទាំសុខភាពរបស់ពួកគេ។