Ñan an diwọj ilo ien eo emokaj tata: Māe 4, 2026 (26-044-Marshallese)
Kepaake: DOH Leto Letak Meḷeḷe
Rijerbal in ājmour ro rej rojāñ ñan wā im pād wōt ilo kapijuknen ilo ien nañinmej ñan jipañ kadiklok ajedeed
OLYMPIA – Bok aidik keej ko rej wonṃaanlok ilo aer laplok ilo Washington yiiō in, ekoba jilu keej ko rej kab waḷok ilo an jab alikkar rekar epāāke nañinmej eo ia. Washington State Department of Health (DOH, Rā eo an Ājmour) (ilo Kajin Pālle) ej piniktak armej ñan lale kakōḷle ko, pād wōt ilo kapijuknen im kepāāke jikin ājmour eo elañe rej eñjake aer nañinmej, im lale bwe ren bōk bok aidik, mump, im rubella (MMR) wā eo ekāāl tata.
Ñan rainin, Washington state emōj an kalikkar 40 keej in bok aidik ilo ralitōk bukwōn ko (ilo Kajin Pālle) ilo allōñ ko emān jinion ilo 2026. Ilo ad lale, ewōr 12 keej ko rekar ripoot ilo aolepen 2025.
Ejjab alikkar ia eo jilu bok aidik keej ilo Washington yiiō in rekar jinoe ie, ekoba ruo ilo Kittitas County im juon ilo Spokane County. Ej meḷeḷein ke elikin etale, rijerbal in ājmour ko rekar jab ṃaroñ kalikkar waween an armej ro kar epāāke nañinmej eo. Mennin eṃaroñ meḷeḷein bok aidik ej ajedeed ilo ad jab jellā ilo jukjukin pād ko ad.
"Jej deḷoñ e juon ded kāāl, im elaplok kauwōtata in an ajedeed bok aidik ilo Washington, im waween de eo ñan bōbrae jukjukin pād ko ad ej ñan an Armej in Washington jerbal ippān doon," Dr. Tao Sheng Kwan-Gett, State Opija in Ājmour, DOH eaar ba. "Aolep rūtto ro im ajri ro rej aikuj bōk MMR wā eo ekāāl ilo ien eo emokaj tata, im aolep – ro emōj aer wā im jañin wā – rej aikuj pād wōt ilo kapijuknen ilo kakōḷle ko jinion in nañinmej, jokdoon ṃōkta jen an jabdewōt lennab jinoe."
Wiik eo lak, Kittitas County Public Health Department (KCPHD, Kittitas County Lobwilej Rā eo an Ajmour) eaar kalikkar ruo bok aidik keej ko (ilo Kajin Pālle) im kwalok kajeen an ṃaroñ kar epāāke nañinmej eo (ilo Kajin Pālle) ilo Valley View Elementary School ikōtaan Eprōḷ 8-15. KCPHD ej uwaak in jukjukin pād eo ej tōl im ej jerbal ippān Valley View Elementary School ñan kadiklok an laplok an ajedeed. Ippān keej kāāl ko ruo ej epāāke juon
keej eo eaar ripoot ṃōkta lak ilo Kittitas County, jikin eo ej kio eñjake an ajedeed bok aidik, āinwot an kōmeḷeḷe āinwot jilu ak eloñlok keej ko repāāke.
Meḷeḷe kake Bok Aidik: Ta eo ñan Lale
Bok aidik elap an kapopo im ej ajedeed ilo mejatoto ñe juon armej ej pokpok, ṃaje, menono, ak kōṇōṇō. Baeroj eo eṃaroñ pād wōt ilo mejatoto lak ñan ruo awa elikin an juon armej emakūt jen jikin eo.
Kakōḷle ko ekkā aer waḷok 7 ñan 21 raan elikin epāāke nañinmej eo im ekoba:
- Piba, pokpok, im uwir boti
- Būroro, dāndān mej
- Juon lennab eo ej jinoe ilo mej innem ajedeed lal lak ñan aolepen enbwin
Elañe enij wōr am ak an baamle eo am kakōḷle in bok aidik, elaptata elañe kwojañin bōk MMR wā eo ekāāl tata, pād wōt mweo imōm, im kūrḷok taktō eo am ak jikin ājmour eo am. Reṃaroñ rojāñ eok kake buñtōn ko ñan bōk, karōk juon iien loelak elañe aikuj, im jipañ kalikkar elañe teej ej aikuj. Jab etal ñan juon jikin taktō ak aujpitōl ilo am jab kall lak ṃōkta ñan ba ñan er ke kwoj konan bwe ren jaak eok ñan bok aidik. Ebar aorōk ñan kadiklok am epāāke ro jōt, elaptata ro rejañin bōbrae nae bok aidik.
"Epidodo an bok aidik ajedeed, im armej reṃaroñ leḷok ñan doon ṃōkta jen aer kiḷe ke renañinmej," Michele Roberts, Assistant Secretary ñan Prevention and Community Health (Bōbrae im Jukjukin Pād Ājmour), DOH. "Eboub mour ko ad aolep, ak eḷañe ewōr am kakōḷle, bōk jidik iien ñan bojrak - pād wōt mweo imōm im kepāāke jikin ājmour eo am. Buñtōn eo epidodo eṃaroñ jipañ bobrae an ajedeed bok aidik ñan ro jōt."
Bok aidik eṃaroñ tōl ñan būrooblem in ājmour ko relaplok, ekoba pneumonia im an ebboj kōmalij. Niñniñ ko, ajri ro redik, im armej ro emojno enbwinnier rej pād ilo kauwōtata eo elaptata.
Bobrae: MMR Wā
MMR wā eo eman im elap an jejjet kūtien an jerbal. Juon alen wā ej 93% jejjet kūtien an jerbal;, im ruo alen wā ej 97% jejjet kūtien an jerbal. Bōk wā elapḷok an kōjbarok jen bōk nañinmej in bok aidik, im ej kōjbarok baamle eo am im jukjukin pād eo am.
Ekkā an ajri ro bōk MMR wā eo aer jinion ilo 1 yiiō dettan im juon wā kein karuo ilo 4 yiiō dettan. DOH ej leḷok tōl eo ejenolok ñan armej ro rej mour ilo ak itotak ñan jikin ko ekkā an ajedeed nañininmej eo, ekoba niñniñ ro rediklok jen 1 yiiō dettan. Rūtto ro rejañin kar wā ak jañin nañinmej in bok aidik rej aikuj bar bōk MMR wā. Elañe kwojjab ṃaroñ kamooḷ MMR wā meḷeḷe ko am im kwar ḷōtak elikin 1957, ej rojāñ bwe kwon bōk juon ilo ien eo emokaj tata ñan kōjbarok. Lale ippān jikin ājmour eo am ñan lale elañe kwoj aikuj elaplok jen juon alen wā. Eloñ armej ro rej bōk nañinmej in bok aidik rejañin bōk wā.
Ñan lale meḷeḷe in wā ko am, loelak myirmobile.com (ilo Kajin Pālle) ak konnaan ippān taktō eo am. Elañe kwar bōk juon MMR wā ilo juon opiij an taktō an jikin ebbok wūno, kwoṃaroñ kajjitōk rekoot ko am ippeir.
Ikkijen Wā
Ewōr wā ko ejelok wonāān ak edik-wonāān ilo:
- Childhood Vaccine Program (Būrokraaṃ in Wā eo an Ajri), eo ej leḷok wā ñan ajri ro lalin 19 yiiō ilo ejelok wonāān, jokdoon jekjek in injuron.
- Adult Vaccine Program (Būrokraaṃ in Wā eo an Rūtto), eo ej lelok wā ñan rūtto ro 19 yiiō ak rūttoḷok im ejelok aer injuron ak edik injuron eo aer.
- Washington Apple Health (Medicaid), eo ej bōk eddoin wā ko rej rojāñ in bōk ilo ejelok wonāān ñan armej ro rej mour ilo Washington im rej kōkar.
Ñan bōnbōn in keej ko ilo kio, jikin ko nañinmej eo ej ajedeed ie, im meḷeḷe ko ikkijen waween bobrae, loelak DOH bok aidik makūtkūt webpeij (ilo Kajin Pālle).
Webjait eo ad (ilo Kajin Pālle) ej ijo kwoṃaroñ bōk joñan meḷeḷe eo eman ñan ājmour. Bōk meḷeḷe ko rekāāl ilo am ḷoore koj ilo intonet (ilo Kajin Pālle).
###