ខ្សែទូរសព្ទសង្គ្រោះជីវិតពេលមានវិបត្តិ និងអត្តឃាត 988

ហៅទូរសព្ទ ផ្ញើសារជាអក្សរ ឬផ្ញើសារជជែកទៅលេខ 988 ដើម្បីភ្ជាប់ទៅ National Suicide Prevention Lifeline (NSPL, ខ្សែទូរសព្ទជាតិសង្គ្រោះជីវិតបង្ការការធ្វើអត្តឃាត) (ជាភាសាអង់គ្លេស)។ ខ្សែទូរសព្ទនេះរក្សាការសម្ងាត់ ឥតគិតថ្លៃ និងបម្រើសេវា 24/7/365។

សេវាមានផ្ដល់ជូនជាភាសាអេស្ប៉ាញ រួមជាមួយសេវាបកប្រែផ្ទាល់មាត់ជាង 250 ភាសា។ សម្រាប់មនុស្សដែលស្ដាប់មិនឮ ពិបាកក្នុង ការស្ដាប់ និងអ្នកប្រើប្រាស់ TTY៖ ប្រើសេវាកម្មបញ្ជូនបន្តដែលអ្នកចង់ប្រើ ឬហៅទូរសព្ទទៅលេខ 711 រួចចុចលេខ 1-800-273-8255។

អ្នកអាចទូរសព្ទទៅលេខ 988 ប្រសិនបើអ្នកកំពុងមាន៖

គំនិតចង់ធ្វើអត្តឃាត
វិបត្តិសុខភាពផ្លូវចិត្ត
ក្ដីកង្វល់អំពីការប្រើប្រាស់សារធាតុញៀន
ទុក្ខព្រួយផ្លូវអារម្មណ៍ក្នុងប្រភេទផ្សេងទៀត

អ្នកក៏អាចហៅទូរសព្ទទៅលេខ 988 បានផងដែរ ប្រសិនបើអ្នកបារម្ភអំពីមនុស្សជាទីស្រលាញ់ដែលអាចនឹងត្រូវការជំនួយដោះស្រាយវិបត្តិ។ 988 មិនប្រើសម្រាប់ជំនួសមជ្ឈមណ្ឌលហៅទូរសព្ទដោះស្រាយវិបត្តិណាមួយក្នុងរដ្ឋវ៉ាស៊ីនតោនឡើយ។ វាជាការបន្ថែមថ្មីបំផុតពីលើបណ្ដាញស្ថាប័នដែលផ្ដល់មជ្ឈមណ្ឌលដោះស្រាយវិបត្តិរបស់រដ្ឋ។ លេខ NSPL ចំនួនដប់ខ្ទង់គឺ 1-800-273-TALK (8255) នៅតែដំណើរការរួមជាមួយ 988 ដដែល។

សម្រាប់សំណួរអំពីកម្មវិធី 988 សូមផ្ញើអ៊ីមែលទៅ 988ProgramInfo@doh.wa.gov។ កុំប្រើប្រអប់សារនេះ ប្រសិនបើអ្នក ឬនរណាម្នាក់ដែលអ្នកស្គាល់ត្រូវការជំនួយដោះស្រាយវិបត្តិ។ ជំនួសមកវិញ សូមហៅទូរសព្ទ ផ្ញើសារជាអក្សរ ឬផ្ញើសារជជែកទៅលេខ 988។

អំពីសេវា 988

ពេលអ្នកហៅទូរសព្ទទៅលេខ 988 អ្នកនឹងត្រូវបានភ្ជាប់ទៅមជ្ឈមណ្ឌលដោះស្រាយវិបត្តិ NSPL។
អ្នកអាចហៅទូរសព្ទ ផ្ញើសារជាអក្សរ ឬផ្ញើសារជជែកទៅលេខ 988 តាមទូរសព្ទដៃ ទូរសព្ទលើតុ ឬឧបករណ៍ទំនាក់ទំនងជាសំឡេងតាមអ៊ីនធឺណិតរបស់អ្នក។
លេខ 10 ខ្ទង់សម្រាប់ NSPL នៅតែដំណើរការដដែល។ អ្នកអាចហៅទូរសព្ទទៅលេខ 1-800-273-TALK (8255) ឬ 988 ក៏បាន។
988 រក្សាការសម្ងាត់ ឥតគិតថ្លៃ និងបម្រើសេវា 24/7/365 ដោយភ្ជាប់មនុស្សដែលមានវិបត្តិផ្លូវចិត្ត ឬប៉ុនប៉ងធ្វើអត្តឃាត ជាមួយអ្នកប្រឹក្សាវិបត្តិដែលឆ្លងកាត់ការបណ្ដុះបណ្ដាល។ អ្នកដែលបារម្ភអំពីមនុស្សជាទីស្រលាញ់ដែលអាចនឹងត្រូវការជំនួយដោះស្រាយវិបត្តិក៏អាចហៅទូរសព្ទទៅលេខ 988 បានផងដែរ។
អ្នកដែលទាក់ទងទៅលេខ 988 មិនតម្រូវឱ្យផ្ដល់ព័ត៌មានផ្ទាល់ខ្លួន ដើម្បីទទួលបានសេវាកម្មនោះទេ។ ការហៅទូរសព្ទអាចត្រូវបានតាមដាន ឬថតទុកក្នុងគោលបំណងធានាគុណភាព ឬបណ្ដុះបណ្ដាល។ ប្រព័ន្ធបណ្ដាញមានប្រព័ន្ធការពារសុវត្ថិភាពជាច្រើន ដើម្បីដោះស្រាយក្ដីកង្វល់អំពីឯកជនភាព។
មិនមានការផ្លាស់ប្ដូរចំពោះការបញ្ជូនក្រុមការងារឆ្លើយតបនឹងវិបត្តិចល័ត និងអ្នកឆ្លើយតបនឹងវិបត្តិដែលបានចាត់តាំង ឬមុខងាររបស់សេវាដោះស្រាយវិបត្តិក្នុងតំបន់ណាមួយផ្សេងទៀតឡើយ។
មជ្ឈមណ្ឌលដោះស្រាយវិបត្តិ NSPL នឹងបន្តប្រតិបត្តិការតាមស្តង់ដារ NSPL ហើយនឹងភ្ជាប់ជាមួយសេវា 911 ក៏ដូចជាសេវាដោះស្រាយវិបត្តិក្នុងតំបន់ដូចដែលពួកគេធ្លាប់បានធ្វើ។

រដ្ឋវ៉ាស៊ីនតោននឹងដាក់ឱ្យប្រើប្រាស់ Native and Strong Lifeline (ខ្សែទូរសព្ទសង្គ្រោះជីវិតដ៏រឹងមាំ និងជនជាតិដើម) សម្រាប់អ្នកដែលជាប់ពាក់ព័ន្ធនឹងសហគមន៍ជនជាតិដើមអាមេរិក និងជនជាតិដើមអាឡាស្ការបស់រដ្ឋវ៉ាស៊ីនតោនដែលហៅទូរសព្ទទៅលេខ 988។ Native and Strong Lifeline គឺជាសេវារបស់ Washington Indian Behavioral Health Hub (មជ្ឈមណ្ឌលសុខភាពឥរិយាបថជនជាតិដើមអាមេរិកនៃរដ្ឋវ៉ាស៊ីនតោន) (ជាភាសាអង់គ្លេស)។ មជ្ឈមណ្ឌលនេះគឺជាធនធានដ៏សំខាន់ទូទាំងរដ្ឋ ដើម្បីបំពេញតម្រូវការរបស់សហគមន៍ដែលជាប់ពាក់ព័ន្ធនឹងកុលសម្ព័ន្ធ ព្រមទាំងសម្របសម្រួលជាមួយទីភ្នាក់ងារកុលសម្ព័ន្ធ អ្នកជំនាញផ្នែកថែទាំសុខភាព មន្ទីរពេទ្យ និងកម្មវិធីព្យាបាលអ្នកជំងឺសម្រាកឆ្លងយប់ ឬមិនឆ្លងយប់នៅមន្ទីរពេទ្យ។ សម្រាប់ព័ត៌មានបន្ថែម សូមមើល NativeAndStrong.org (ជាភាសាអង់គ្លេស) និង National Suicide Prevention Lifeline (ជាភាសាអង់គ្លេស)។

House Bill 1477 និងការបង្កើតសេវា 988

នៅឆ្នាំ 2020 Federal Communications Commission (FCC, គណៈកម្មការទំនាក់ទំនងសហព័ន្ធ) បានអនុម័ត National Suicide Hotline Designation Act (ច្បាប់ស្ដីពីការចាត់ចែងខ្សែទូរសព្ទបន្ទាន់ជាតិផ្នែកធ្វើអត្តឃាត)។ ច្បាប់នេះបានកំណត់យក 988 ជាលេខ 3 ខ្ទង់ថ្មីដែលងាយចងចាំក្នុងការហៅទូរសព្ទ ផ្ញើសារជាអក្សរ និងផ្ញើសារជជែកទូទាំងប្រទេស សម្រាប់បុគ្គលទាំងឡាយដែលកំពុងជួបវិបត្តិសុខភាពផ្លូវចិត្ត ឬប៉ុនប៉ងធ្វើអត្តឃាត។

ក្នុងរដ្ឋវ៉ាស៊ីនតោន អង្គនីតិបញ្ញត្តិបានអនុម័ត House Bill (សេចក្ដីព្រាងច្បាប់) 1477 (E2SHB 1477) (ជាភាសាអង់គ្លេស) ដើម្បីគាំទ្រសេវា 988។ វាបានពង្រីក និងធ្វើឱ្យសេវាបង្ការការធ្វើអត្តឃាត ក៏ដូចជាការឆ្លើយតបនឹងវិបត្តិសុខភាពមានភាពប្រសើរឡើងសម្រាប់អ្នកគ្រប់គ្នាក្នុងរដ្ឋវ៉ាស៊ីនតោន។ E2SHB 1477 ត្រូវបានចុះហត្ថលេខាអនុម័តដោយលោកអភិបាលរដ្ឋ Jay Inslee នៅថ្ងៃទី 13 ខែឧសភា ឆ្នាំ 2021។ E2SHB 1477 ក៏ត្រូវបានគេស្គាល់ផងដែរថាជា Crisis Call Center Hubs and Crisis Services Act (ច្បាប់ស្ដីពីមជ្ឈមណ្ឌលហៅទូរសព្ទដោះស្រាយវិបត្តិ និងសេវាដោះស្រាយវិបត្តិ។

E2SHB 1477 ក៏បានបង្កើតគណៈកម្មាធិការ Crisis Response Improvement Strategy (CRIS, យុទ្ធសាស្ត្រកែលម្អការឆ្លើយតបនឹងវិបត្តិ) និងគណៈកម្មាធិការអចិន្ត្រៃយ៍ផងដែរ។ គណៈកម្មាធិការទាំងនេះនឹងរៀបចំការណែនាំដល់អភិបាលរដ្ឋ និងអង្គនីតិបញ្ញត្តិ ដើម្បីជួយអនុវត្តលេខ 988 និងផ្នែកនានានៃច្បាប់ E2SHB 1477 របស់ជាតិ។ ប្រសិនបើអ្នកចង់ចូលរួមក្នុងនាមជាសមាជិកនៃសាធារណជន អ្នកអាច ចុះឈ្មោះចូលរួមកិច្ចប្រជុំ និងដាក់បញ្ជូនមតិសាធារណជន (ជាភាសាអង់គ្លេស)។

សម្រាប់ព័ត៌មានលម្អិតពេញលេញ សូមមើលគេហទំព័រគណៈកម្មាធិការ Crisis Response Improvement Strategy (CRIS) (ជាភាសាអង់គ្លេស)។

មជ្ឈមណ្ឌលហៅទូរសព្ទដោះស្រាយវិបត្តិ

ផែនទីពណ៌នៃខោនធីក្នុងរដ្ឋវ៉ាស៊ីនតោនដែលដាក់ពណ៌ទៅតាមមជ្ឈមណ្ឌលដោះស្រាយវិបត្តិដែលនឹងទទួលទូរសព្ទពីលេខកូដតំបន់របស់ខ្លួន។ — ផែនទីខោនធីដែលមជ្ឈមណ្ឌលដោះស្រាយវិបត្តិ NSPL នីមួយៗទទួលទូរសព្ទ។

រដ្ឋវ៉ាស៊ីនតោនមានមជ្ឈមណ្ឌលដោះស្រាយវិបត្តិ NSPL ចំនួនបីដែលទទួលទូរសព្ទពីជុំវិញរដ្ឋ៖

Volunteers of America of Western Washington
Frontier Behavioral Health
Crisis Connections

ការហៅទូរសព្ទរបស់អ្នកនឹងត្រូវបានបញ្ជូនបន្តទៅមជ្ឈមណ្ឌលដោះស្រាយវិបត្តិមួយក្នុងចំណោមទាំងនេះ ផ្អែកលើផែនទីនៅខាងស្ដាំដៃ។ ការហៅទូរសព្ទត្រូវបានបញ្ជូនតាមលេខកូដតំបន់របស់អ្នក។

មជ្ឈមណ្ឌលដោះស្រាយវិបត្តិកំពុងជ្រើសរើសបុគ្គលិកផ្នែកថែទាំឥឡូវនេះ! ប្រសិនបើអ្នកចាប់អារម្មណ៍នឹងអាជីពជួយមនុស្សមានវិបត្តិ សូមដាក់ពាក្យសុំធ្វើការជាមួយមជ្ឈមណ្ឌលដោះស្រាយវិបត្តិ NSPL (ជាភាសាអង់គ្លេស)។

សំណួរចោទសួរជាញឹកញាប់

តើ National Suicide Prevention Lifeline (NSPL) គឺជាអ្វី ហើយតើសេវា 988 ប្រើជំនួស NSPL ឬអត់?

NSPL គឺជាបណ្ដាញជាតិនៃមជ្ឈមណ្ឌលដោះស្រាយវិបត្តិក្នុងតំបន់

ឯករាជ្យ និងផ្ដល់ថវិកាដោយរដ្ឋ។ មជ្ឈមណ្ឌលទាំងនេះត្រូវបានបំពាក់បរិក្ខារដើម្បីឆ្លើយតប និងជួយមនុស្សកំពុងមានទុក្ខព្រួយផ្លូវអារម្មណ៍ ឬកំពុងមានគំនិតចង់ធ្វើអត្តឃាត។

988 មិនប្រើជំនួសលេខទូរសព្ទ NSPL ទេ ប៉ុន្តែផ្ដល់វិធីមួយទៀតដែលកាន់តែងាយស្រួលសម្រាប់មនុស្សក្នុងការទាក់ទងទៅមជ្ឈមណ្ឌលដោះស្រាយវិបត្តិកាន់តែច្រើន។ អ្នកអាចហៅទូរសព្ទទៅលេខ 988 ឬ 1-800-273-TALK (8255) ក៏បានដើម្បីឱ្យគេ

ភ្ជាប់។

តើមានអ្វីកើតឡើង នៅពេលខ្ញុំហៅទូរសព្ទទៅលេខ 988?

នៅពេលហៅទូរសព្ទទៅលេខ 988 ជាដំបូងអ្នកហៅទូរសព្ទឮសារស្វាគមន៍ ខណៈដែលការហៅទូរសព្ទរបស់ពួកគេត្រូវបានភ្ជាប់ទៅមជ្ឈមណ្ឌលដោះស្រាយវិបត្តិនៃបណ្ដាញ NSPL (ផ្អែកតាមលេខកូដតំបន់របស់អ្នកហៅទូរសព្ទ)។ អ្នកប្រឹក្សាអំពីវិបត្តិដែលបានឆ្លងកាត់ការបណ្ដុះបណ្ដាលជាអ្នកទទួលទូរសព្ទ ស្ដាប់អ្នកហៅទូរសព្ទនិយាយ ស្វែងយល់ថាតើបញ្ហាប៉ះពាល់ពួកគេដូចម្ដេចខ្លះ ផ្ដល់ជំនួយ និងចែករំលែកធនធាន ប្រសិនបើចាំបាច់។ ប្រសិនបើមជ្ឈមណ្ឌលដោះស្រាយវិបត្តិក្នុងតំបន់មិនអាចទទួលទូរសព្ទបានទេ អ្នកហៅទូរសព្ទត្រូវបានភ្ជាប់ទៅមជ្ឈមណ្ឌលដោះស្រាយវិបត្តិបម្រុងរបស់ជាតិដោយស្វ័យប្រវត្តិ។ NSPL ផ្ដល់សេវាទូរសព្ទសម្រាប់មជ្ឈមណ្ឌលដោះស្រាយវិបត្តិក្នុងពេលជាក់ស្ដែងជាភាសាអង់គ្លេស និងអេស្ប៉ាញ ហើយប្រើ Language Line Solutions ដើម្បីផ្ដល់សេវាបកប្រែជាង 250 ភាសាបន្ថែមសម្រាប់អ្នកដែលហៅទូរសព្ទទៅលេខ 988។
សម្រាប់ព័ត៌មានបន្ថែមអំពីការភ្ជាប់ទូរសព្ទ សូមមើលក្រាហ្វព័ត៌មាន 988 នេះ (ជាភាសាអង់គ្លេស)។

តើសេវា 988 បានចាប់ផ្ដើមដំណើរការទូទាំងប្រទេសនៅពេលណា?

ថ្ងៃទី 16 ខែកក្កដា ឆ្នាំ 2022។ លេខកូដហៅទូរសព្ទ 988 អាចប្រើបានទូទាំងប្រទេស។

អតីតអ្នកបម្រើការ និងសមាជិកសេវាកម្មអាចទាក់ទងទៅ Veterans Crisis Line (ខ្សែទូរសព្ទសម្រាប់វិបត្តិអតីតអ្នកបម្រើការ) (ជាភាសាអង់គ្លេស) ដោយចុចលេខ 1 បន្ទាប់ពីហៅទូរសព្ទ ឬផ្ញើសារទៅលេខ 988 (ឬ 1-800-273-TALK (8255)) ការជជែកលើអ៊ីនធឺណិត (ជាភាសាអង់គ្លេស) ឬផ្ញើសារទៅលេខ 838255។

តើសេវា 988 ខុសពីប្រព័ន្ធ 911 ដូចម្ដេច?

សេវា 988 ត្រូវបានបង្កើតឡើងដើម្បីធ្វើឱ្យលទ្ធភាពទទួលបានសេវាដោះស្រាយវិបត្តិកាន់តែប្រសើរឡើងតាមវិធីដែលបំពេញតាមតម្រូវការថែទាំក្នុងវិបត្តិពាក់ព័ន្ធនឹងសុខភាពផ្លូវចិត្ត និងការធ្វើអត្តឃាតដែលកំពុងកើនឡើងក្នុងប្រទេស។ សេវា 988 ផ្ដល់ភាពងាយស្រួលជាងក្នុងការទាក់ទងទៅបណ្ដាញ NSPL និងទទួលបានធនធានក្នុងវិបត្តិដែលពាក់ព័ន្ធ ដែលខុសពីគោលបំណងរក្សាសុវត្ថិភាពសាធារណៈរបស់ប្រព័ន្ធ 911។ ប្រព័ន្ធ 911 ផ្ដោតលើការផ្ដល់ Emergency Medical Services (EMS, សេវាវេជ្ជសាស្ត្របន្ទាន់) បញ្ជូនក្រុមពន្លត់អគ្គិភ័យ និងប៉ូលីសនៅពេលចាំបាច់។

ប្រសិនបើខ្ញុំហៅទូរសព្ទទៅលេខ 988 តើក្រុមសង្គ្រោះបឋម ដូចជាប៉ូលិស ឬ EMS ជាដើមនឹងត្រូវបានបញ្ជូនមកដោយស្វ័យប្រវត្តិដែរទេ?

គោលដៅចម្បងនៃសេវា 988 គឺផ្ដល់ជំនួយសម្រាប់មនុស្សកំពុងមានវិបត្តិដែលប៉ុនប៉ងធ្វើអត្តឃាត ឬមានទុក្ខព្រួយពាក់ព័ន្ធនឹងសុខភាពផ្លូវចិត្តក្នុងគ្រាដែលពួកគេត្រូវការជំនួយបំផុត ដោយផ្ដោតលើមនុស្សមានវិបត្តិ។

ភាគច្រើនបំផុតនៃមនុស្សដែលស្វែងរកជំនួយពីសេវា 988 មិនត្រូវការអន្តរាគមន៍បន្ថែមនៅគ្រានោះទេ។ បច្ចុប្បន្ន ការហៅទូរសព្ទទៅ NSPL ដែលត្រូវការសេវាសង្គ្រោះបន្ទាន់ដូចជា 911 មានតិចជាង 2%។ ទោះបីជាបញ្ហាសុខភាព និងសុវត្ថិភាពមួយចំនួនអាចធានាថាមានការឆ្លើយតបពីភ្នាក់ងារអនុវត្តច្បាប់ និង/ឬ EMS (ដូចជានៅពេលកំពុងមានការប៉ុនប៉ងធ្វើអត្តឃាតជាដើម) ការឆ្លើយតបដែលសម្របសម្រួលដោយសេវា 988 មានបំណងលើកកម្ពស់ស្ថិរភាព និងការថែទាំក្នុងវិធីដែលមិនសូវតឹងរ៉ឹងបំផុត។

តើការហៅទូរសព្ទទៅលេខ 988 នឹងបង្វែរទៅលេខ 911 ដែរទេ?

ការហៅទូរសព្ទទៅលេខ 988 មានភាគរយតិចតួចដែលត្រូវការប្រើប្រព័ន្ធ 911 នៅពេលមានហានិភ័យដែលហៀបនឹងកើតឡើងចំពោះជីវិតនរណាម្នាក់ដែលមិនអាចពន្យារពេលក្នុងអំឡុងពេលហៅទូរសព្ទ។ ក្នុងករណីទាំងនេះ អ្នកប្រឹក្សាអំពីវិបត្តិចែករំលែកព័ត៌មានជាមួយប្រព័ន្ធ 911 ដែលមានសារៈសំខាន់ក្នុងការសង្គ្រោះជីវិតរបស់អ្នកហៅទូរសព្ទ។

តើការហៅទូរសព្ទរបស់ខ្ញុំទៅលេខ 988 នឹងត្រូវបានថតទុកដែរទេ?

ចម្លើយ៖ សារស្វាគមន៍នៃសេវា 988 បញ្ជាក់ថាការហៅទូរសព្ទអាចត្រូវបានតាមដាន ឬថតទុកក្នុងគោលបំណងធានាគុណភាព។ បន្ថែមពីនេះ មជ្ឈមណ្ឌលដោះស្រាយវិបត្តិនៅក្នុងបណ្ដាញ NSPL អាចប្រើសំឡេងថតនៃការហៅទូរសព្ទដោយឯករាជ្យក្នុងគោលបំណងបណ្ដុះបណ្ដាល អាស្រ័យលើការអនុវត្តប្រសើរបំផុតរបស់មជ្ឈមណ្ឌល។

អ្វីដែលសំខាន់គឺត្រូវកត់សម្គាល់ផងដែរថា អ្នកដែលទាក់ទងទៅលេខ 988 មិនតម្រូវឱ្យផ្ដល់ព័ត៌មានផ្ទាល់ខ្លួន ដើម្បីទទួលបានសេវាកម្មនោះទេ។ Substance Abuse and Mental Health Services Administration (រដ្ឋបាលនៃសេវាសុខភាពផ្លូវចិត្ត និងការបំពានសារធាតុញៀន) ទទួលស្គាល់នូវសារៈសំខាន់ និងការរំពឹងទុកអំពីឯកជនភាព នៅពេលមនុស្សម្នាក់ទាក់ទងទៅលេខ 988។ ប្រព័ន្ធបណ្ដាញមានប្រព័ន្ធការពារសុវត្ថិភាពជាច្រើន ដើម្បីដោះស្រាយក្ដីកង្វល់អំពីឯកជនភាព។

តើលេខ 988 អាចប្រើសម្រាប់ក្ដីកង្វល់អំពីការប្រើប្រាស់សារធាតុញៀនបានទេ?

បាន អ្នកអាចហៅទូរសព្ទទៅលេខ 988 សម្រាប់ក្ដីកង្វល់អំពីការប្រើប្រាស់សារធាតុញៀន ប៉ុន្តែក្នុងករណីបន្ទាន់ដោយសារការប្រើហួសកម្រិត សូមហៅទូរសព្ទទៅលេខ 911 និងប្រើថ្នាំ Naloxone។

តើប្រព័ន្ធ 988 បានថវិកាមកពីណា?

សភាបានផ្ដល់ថវិកាសម្រាប់កម្លាំងពលកម្មដល់ Department of Health and Human Services (ក្រសួងសុខាភិបាល និងសេវាជួយមនុស្ស) តាមរយៈ American Rescue Plan (គម្រោងសង្គ្រោះអាមេរិក) ដោយថវិកាមួយចំនួនគាំទ្រកម្លាំងពលកម្មសម្រាប់សេវា 988។

សំណើសុំថវិកាក្នុងឆ្នាំសារពើពន្ធ 2022 របស់ប្រធានាធិបតីផ្ដល់ថវិកាបន្ថែមសម្រាប់ NSPL ផ្ទាល់ និងសម្រាប់ប្រភពថវិកាដោះស្រាយវិបត្តិសហព័ន្ធផ្សេងទៀត។

នៅថ្នាក់រដ្ឋ បន្ថែមពីលើចរន្តថវិកាក្នុងវិស័យរដ្ឋ/ឯកជនដែលមានស្រាប់ National Suicide Hotline Designation Act (ច្បាប់ស្ដីពីការចាត់ចែងខ្សែទូរសព្ទបន្ទាន់ជាតិផ្នែកធ្វើអត្តឃាត) នៃឆ្នាំ 2020 អនុញ្ញាតឱ្យរដ្ឋនានាអនុម័តថ្លៃសេវាទូរគមនាគមន៍ថ្មីក្នុងរដ្ឋ ដើម្បីគាំទ្រដល់ការដំណើរការសេវា 988។

E2SHB 1477 ទទួលបានថវិកាបន្ថែមពីពន្ធលើខ្សែទូរសព្ទ និងប្រូតូកូលទំនាក់ទំនងជាសំឡេងតាមអ៊ីនធឺណិតរបស់រដ្ឋវ៉ាស៊ីនតោន។

តើសេវា 988 មានផ្ដល់ជូនជាភាសាអ្វីខ្លះ?

បច្ចុប្បន្ន ខ្សែទូរសព្ទសង្គ្រោះជីវិតពេលមានវិបត្តិ និងអត្តឃាត 988 ផ្ដល់សេវាទូរសព្ទសម្រាប់មជ្ឈមណ្ឌលដោះស្រាយវិបត្តិក្នុងពេលជាក់ស្ដែងជាភាសាអង់គ្លេស និងអេស្ប៉ាញ ហើយប្រើ Language Line Solutions ដើម្បីផ្ដល់សេវាបកប្រែជាង 250 ភាសាបន្ថែម។ បច្ចុប្បន្ន សារជាអក្សរ និងសារជជែកអាចប្រើជាភាសាអង់គ្លេសប៉ុណ្ណោះ។

តើសេវា 988 ជួយសម្រួលដល់មនុស្សពិបាកស្ដាប់ ឬពិការភ្នែកដែរទេ?

បច្ចុប្បន្ន សេវា 988 ផ្ដល់សេវាសម្រាប់អ្នកប្រើប្រាស់ TTY តាមរយៈសេវាបញ្ជូនបន្តដែលពួកគេចង់ប្រើ ឬតាមការហៅទូរសព្ទទៅលេខ 711 រួចចុចលេខ 1-800-273-8255។ 988 ក៏ផ្ដល់សេវាតាមរយៈសារជជែក និងសារជាអក្សរផងដែរ។ NSPL កំពុងស្ថិតក្នុងដំណើរការពង្រីកទៅសេវាទូរសព្ទជាវីដេអូ ដើម្បីផ្ដល់សេវាកាន់តែប្រសើរជូនបុគ្គលស្ដាប់មិនឮ ឬពិបាកស្ដាប់ដែលស្វែងរកជំនួយតាមរយៈសេវា 988។

សម្រាប់ព័ត៌មានបន្ថែមអំពីអ្វីដែលកើតឡើង នៅពេលអ្នកហៅទូរសព្ទទៅលេខ 988 សូមមើលក្រាហ្វព័ត៌មាននេះពី NSPL (ជាភាសាអង់គ្លេស)។

Substance Abuse and Mental Health Services Administration (SAMHSA) (ជាភាសាអង់គ្លេស) គឺជាទីភ្នាក់ងារឈានមុខគេរបស់សហព័ន្ធក្នុងកិច្ចសហការជាមួយ Federal Communications Commission (FCC) (ជាភាសាអង់គ្លេស) និង Department of Veterans Affairs (ក្រសួងកិច្ចការអតីតអ្នកបម្រើការ) (ជាភាសាអង់គ្លេស)។ Vibrant Emotional Health (សុខភាពផ្លូវអារម្មណ៍ដ៏រស់រវើក) (ជាភាសាអង់គ្លេស) គឺជាស្ថាប័នគ្រប់គ្រងរដ្ឋបាលជាតិលើ NSPL និងសេវា 988។

ធនធាន

លេខទំនាក់ទំនងពេលមានវិបត្តិ៖
- Suicide Prevention Lifeline (ជាភាសាអង់គ្លេស)
- Veterans Crisis Line (ជាភាសាអង់គ្លេស)
- Teen Link (ជាភាសាអង់គ្លេស)
- The Trevor Project (ជាភាសាអង់គ្លេស)
ធនធានតាមរយៈ 988
- ការណ៍ពិតត្រួសៗអំពីសេវា 988 (PDF)